Eleisaun Timor-Leste: Atu husik ona violensia ka?

ICG

SUMÁRIU /Eleisaun geral 2012 iha Timor-Leste sei sai hanesan prova importante ba nasaun nia resiliênsia bainhira selebra tinan sanulu ba independensia.

The full briefing is available in English.

Koalizaun governu komesa ona ho mudansa balun de’it ne’ebé nesesáriu depois de Krize 2006, maibe nasaun nia prosperidade ne’ebé aumenta oras dadaun ne’e kria ona interese ba estabilidade ne’ebé sai boot liu. Sei difisil hodi halo predisaun ba resultadu eleisaun oinmai tanba kandidatu no partidu barak atu partisipa no mós hahalok ida ne’ebe sidadaun sira vota ba kandidatu ka partidu bazeia ba asuntu polítiku seidauk metin. Eleisaun ne’ebé lao ho didi’ak maka importante laos de’it nu’udar pasu esensiál iha prosesu liu husi ONU nia misaun bele taka; eleisaun sira bele mós fo korajen ba lider sira hodi hare’e ba nasaun nia desafiu todan liu.

Agora dadaun, nasaun mak hakmatek liu duké tinan 2007 bainhira halo eleisaun geral ikus liu, maibe abut frakeza sira sei eziste. Relasaun entre lider polítiku sira maka di’ak liu, maibe sei iha hirus kle’an kona-ba pasadu, liuliu kona-ba Krize 2006. Númeru ba juventude ne’ebé serbisu laek hasa’e hela, liuliu iha Dili, no grupu no grupu arte marsiais sei kria problema. Ema la hatene se asuntus sira ne’e sei hamanas relasaun polítiku, maibe manipulasaun ba frustrasaun sira ne’e iha potensiál hodi kria konflitu.

Iha kandidatu babarak ba konkursu polítiku rua ne’e, maibe dala ida tan konkursu loloos mak entre lider ho naran-boot balu de’it. Depois de rounde primeiru ba eleisaun presidensial, loron 17 Marzu, kandidatu sira ne’e iha potensiál hodi kontinua ba rounde segundu iha Abril mak hanesan: inkumbente, José Ramos-Horta; Presidente ba Parlamentu Nasional atuál, Fernando ‘Lasama’ Araújo; ninia antesessor, Francisco ‘Lu Olo’ Guterres; no Komandante ba Forsa Defensa uluk nian, Taur Matan Ruak. Partidu ruanulu resin haat sei partisipa iha eleisaun parlamentar iha Juni rohan, maibe partidu rua de’it iha kbiit nato’on atu manan maioridade: Primeiru Ministru Xanana Gusmão nia Congressu Nasional de Reconstrução de Timor-Leste (CNRT) no partidu ne’ebé uluk forma governu primeiru, Frente Revolucionária de Timor-Leste Independente (Fretilin). Resultadu provavel liu mak partidu boot ida bele forma governu koalizaun hamutuk ho partidu ki’ik balu; partidu ki’ik 22 tama eleisaun. Tanba partidu babarak no mós partidu foun atu partisipa, susar tebes halo predisaun kona-ba resultadu eleisaun.

Tensaun polítiku hamenus ona antes de votasaun no situasaun seguransa mak estavel, maski kazu krime violentu aumenta uituan. Bainhira tempu kampaña mai besik liu no situasaun polítiku hamanas, kapasidade polísia sei menus no resultadu maka iha risku ba seguransa barak. Polísia ONU nian no Forsa Estabilizasaun Internasional (ISF), ne’ebé ki’ik, bele fo apoiu ho kontrolu ba ema lubun boot ka distúrbiu, maibe tenke hare’e ba opsaun seluk. Grupu sosiedade sivil iha papél iha edukasaun sivika ba votante sira no mós bele halo monitorizasaun kona-ba se partidu tuir kodigu ba konduktu ka lae. Sira mós bele hare’e se grupu arte marsiais hamosu violensia ka halo ameasa durante tempu eleisaun. Informasaun publiku tenke forma parte xave ba servisu sentru operasaun konjuntu ba seguransa eleisaun ne’ebé planu ona. Boatu bele provoka violensia no atensaun lalais hosi polísia hodi kombate informasaun la’os bele prevene konflitu. Impunidade maisomenus kompletu ba ema ne’ebe hamosu violensia politika maka risku konflitu boot liu: kandidatu sira tenke haklaru katak ba oin krime hanesan ne’e labele hasai de’it.

ONU mós iha papél. Autoridade nasional sei simu responsibilidade administra eleisaun sira ne’e, maibe misaun ONU nian tenke prepara an hodi halo pasu publiku no mós privadu hodi hatan ba violasaun grave ba regulamentu eleitoral. Resultadu ida hosi ONU nia presensa iha Timor-Leste ba tinan sanulu resin tolu maka ninia dedikasaun makaas ba eleisaun livre no justu, mezmu nu’udar apoiu-nain de’it.

Violensia eleitoral ne’ebe mosu iha istória badak Timor-Leste nian mak hanesan sintoma ba rivalidades polítiku maka’as. Abut rivalidades sira ne’e mak iha luta ba independensia no poder polítiku. Relasaun entre lider polítiku sira bele hadia iha longuprazu, maibe eziste pasu balun ne’ebé atór sira bele konsidera iha mediuprazu hodi hamenus tensaun. Pasu sira ne’e inklui halo eleisaun presidensial no parlamentar iha tinan la hanesan no suporta dezenvolvimentu ba sistema forte no independente hodi halo sondajen no halibur dadus kona-ba votasaun. Mudansa ba programa eleitoral bele hamenus tensaun besik tempu eleisaun. Sondajen ka informasaun di’ak liu bele ajuda partidu aliña sira nia espetativa ho realidade no hamenus presaun no risku ba violensia bainhira autoridade fahe resultadu eleisaun.

Maske eleisaun ne’ebe la iha violensia grave mak rekezitu ba ONU nia planu hodi taka ninia misaun iha Timor-Leste, kompetasaun forte no hakmatek mak importante duni ba nasaun nia estabilidade iha longuprazu. Ema Timor barak senti nervozu katak eleisaun sira ne’e bele hamosu violensia fali. To’o agora, mudansa barak hori 2006 seidauk realiza tanba ema balun sei tauk katak mudansa sira ne’e bele hamonu estabilidade. Eleisaun ne’ebe lao ho didi’ak bele fo konfianza ba governu foun hodi haka’as an atu kria konsensus no halo mudansa ne’ebe hamentin governasaun tuir lei nasaun nian.

Díli/Jakarta/Bruselas, 21 de fevereiru 2012

Comments

comments